一切安好

轉眼間，已經一年冇 update。不過呢段時間都有去瀏覽其他媽媽嘅 blog，看看其他差不多年紀嘅小朋友的進度。

Janjan BB 已有21個月大。感恩，BB 一切安好。

BB 一歲嘅時候，喺嫲嫲屋企開咗個小小生日會，我特別做咗個生日蛋糕同BB慶祝, 第一次整，雖然唔係好靚，但小小心意，作一個紀念。

大約13-14 個月，BB開始識行。之後差唔多每日都會同BB出去散步。

語言方面，我覺得 ok。BB都算肯講嘢，教佢講說話時，佢會跟住我講。我覺得佢都算識幾多生字，尤其是動物名。但佢對 A-Z 冇興趣，所以仲未識。不過我覺得冇急切需要去學，所以都冇迫佢學。

食嘢方面都 ok。鍾意食甜嘢同水果，唔肯食芝士(同我一樣)。奶就勉強地一日飲16oz 左右。

高度同體重一直維持喺 40% 生長線左右。

8 months

哎唷。。。 話咁快， 又一個月喇。

亞B仍然好黐身， 我一轉身佢就喊, 爸爸抱都喊, 但我一行近就收聲. 夜晚瞓覺OK, 十點幾瞓到朝早八點.

食嘢都OK, 但仍然係小食多餐, 唔飲水, 所以我仍然好忙, 每兩三個鐘就要餵固體食物/奶.
呢個半月試咗蘋果, 啤梨, 藍莓, 洋葱, 白菜, 粟米, 菠菜, 椰菜, 椰菜花, 南瓜,  麵包, 豆腐, 蛋黃, 蛋白, 雞肉, 豬肉, 牛肉 & 火雞肉. 基本上大部分我會買嘅都試咗, 冇特別去諗新食物去試. 而果仁, 花生比較易敏感, 諗住等BB大D先試 . 至於蝦蟹及其他海產, 我本身敏感 , 所以都等BB大D先 試.

仍然得兩隻牙仔, 佢好鍾意食BB零食果D veggie puff, 一見到個罐罐就好開心. 另外亦好鍾意食水果同麵包, 而家我會攞住D較淋嘅水果, 等亞B自己咬.

仲未識向前爬, 只會向後爬, 我試過用玩具引佢, 但佢只會眼定定望住, 唔會向前爬, 有時會趴向前, 然後坐起, 再趴向前, 去攞想要嘅嘢. 自己識得由瞓低轉身坐喺度, 前兩日喺圍欄玩玩吓, 仲自己扶住欄桿企咗起身. 讚佢叻, 佢就好開心咁笑.

7 months

囉囉攣 ... 囉囉攣 .. 話咁快亞B已經七個月大, 而家老公有時會自己一個帶亞B去奶奶度,
俾我放(所謂)一日假. 但每次亞B唔喺身邊, 我都好囉囉攣, 唔捨得, 坐唔安, 食唔落, 重心跳得比較快, 成日"拿"住咁.

有時好想跟埋去, 但如果我去, 老公又會吹三吹四, 吹我出門口, 發脾四. 大佬呀, 我又要幫亞B沖涼換衫, 執尿片奶粉袋, 同預備亞B下午餐 solid food, 又要執吓自己個樣同個頭. 個零鐘都唔等得. =/ 所以有時就算唔捨得, 都由佢自己一個帶亞B去.  當俾個機會亞B黐多D爹哋, 喺屋企亞B好黐我, 有時爹哋抱都喊.

所謂放假, 其實係等我做D平時冇時間做嘅嘢. 例如: 執屋, 淋花換泥, 整D較花時間嘅晚餐, etc.


亞B而家嘅 schedule 係:
一日食四餐奶+三餐, 再加兩次小睡. 但亞B唔肯自己瞓, 就算攰, 捽眼仔, 好多時要氹好耐先瞓. um..  

08:30-09:30am:       起身 +  飲奶

10:30-11:30am:       水果麥皮

11:30-12:30:            飲奶 + 小睡

13:30-14:00pm:       粥 (蔬菜 + 肉)

16:00-17:30pm:       飲奶 + 小睡

18:30-20:00pm:       粥 (蔬菜 + 肉)

21:00-22:00pm:       飲奶 + 瞓覺



另外, 198 days 發現亞B開始出牙仔, 而家下面兩隻門牙已經露咗出牙肉. =)

進展

時間過得真係快, 又過咗兩個星期. 亞B六個月時見醫生例行檢查和打針, 跟住醫生就講一下點樣開始引進固體食物. 醫生個建議令我好 surprise, 但幾開心. 佢話可以每日引進一種新食物, 蔬菜/水果/肉類都冇問題, 但一歲前唔好飲鮮奶. 一日三餐固體食物, 亞B想食幾多就幾多. 咁樣就可以快D試完唔同食材, 之後亞B就可以跟大人食, 我哋食乜佢食乜. =)


另外, 奇怪嘅係醫生冇答我究竟好唔好俾水亞B飲, 只係話亞B口渴就飲奶, 飲奶就會吸收充足水份...  因為我 hubby 唔信中藥/五行/寒底熱底之類嘅嘢, 我唯有靜靜雞每隔一星期就會用開奶茶沖一次奶俾亞B飲, so far,  亞B飲得 ok, 我覺得亞B飲咗開奶茶之後果幾日, 胃口好似好啲, 等我再繼續留意吓先.

暫時亞B食得 ok, 除咗紅蘿蔔 & 椰菜仔(Brussels sprouts) 好似唔太鍾意, 其他食物我俾乜佢都食. 而家試咗牛油果, 白米, 糙米, 麥皮, 三文魚, 西蘭花, 青豆 (peas),  四季豆(green beans), 眉豆, 紅蘿蔔, 蕃薯, 薯仔, 蕃茄, 椰菜仔, 車厘子, 提子, 香蕉, 同黃桃.

早餐通常我開麥皮, 因為快, 又有營養. 午餐同晚餐就試新食物.  之前多數整蔬菜蓉, 而家慢慢開始整粥仔, or 溝蕃薯或薯仔蓉. 另外我發覺如果亞B飲唔夠奶夜晚會瞓唔"冧", 成晚典來典去, 所以通常我會喺兩餐奶之間餵固體食物, 每餐食大約有 1/3 至 1/2 cup.

大約五個半月亞B開始戒到夜奶, 可以瞓到六七個鐘, 我係果種一醒就好難瞓返嘅人, 之前每日只瞓到大約四五個鐘, 而家我終於可以瞓多少少.

六個月時, 亞B重16磅 1.5 安士.  另外, 上星期 198 days, 發現亞B開始出牙仔, 我用手可以摸到下顎門牙尖尖地凸咗出嚟. 真係唔覺唔覺, BB真係好快大.

固體食物

尋日開始餵BB食固體食物. 因為亞B一直有厭奶問題, 又一直未戒夜奶, 所以之前我已經試過加小小 rice cereal 入奶粉度, 但都冇幫助. 所以我唔諗住餵米糊了. 

近日可能牛油果當造, 成日喺超級市場見到, 加上營養豐富, 呢幾日亞B會食牛油果先. 我打算之後再試紅蘿蔔, 蕃薯, 同南瓜(不過唔知有冇得賣), 仲有蕃茄先. 咁之後就開始煲粥仔. 

尋日亞B第一次食牛油果, 頭5分鐘有張開囗俾我餵, 之後就掛住玩囗水肩同摟計(亞B一向唔鍾意坐, 次次坐一陣就摟計). 不過最後都餵咗35分鐘, 食咗2/3. 都 ok 啦. =)

其實, 我都唔知亞B餓唔餓, 因為厭奶問題, 佢一向食無定時, 我都冇佢辦法. 希望佢食固體食物時, 乖乖哋, 否則又有排煩. >.< 


呢度係半個細嘅牛油果(加半安士奶溝稀小小).